ЗЕМЈОДЕЛЦИТЕ ВО ЈЕГУНОВЦЕ НА ОБУКА Со технологија во земјоделството за нови бизниси
Земјоделците можат да користат технологија што ќе им помогне во пласирање на нивните производи. Ваква обука во тетовско Јегуновце добија производителите на овошје, билки и други плодови, кои можат да се сушат преку соларна сушарница за храна.
– Наместо да се грижат за краткиот рок на траење на производите, земјоделците имаат можност да ги стават плодовите во соларна сушара. Потоа сушеното овошје, месо и други плодови може да се продаваат на подолг рок. Наместо традиционалното сушење на сонце, со изложеност на атмосферски влијанија, овошјето и билките можат да се дехидрираат во строго контролирани и хигиенски услови – изјави Војислав Антовски, предавач на обуката за проектот „Експанзија на мали бизниси за користење на соларна сушарница“.
Преку иновации и модернизација на земјоделското проиводство, проектот има цел поттикнување на руралниот развој и економски раст на руралните средини.
– Сушарницата, освен што овозможува надминување на проблемот со трајноста, претставува една значајна можност за земјоделците за достигнување повисока цел односно нов бизнис со производство и пласман на сушени производи кои веќе имаат високи цени на пазарот – рече Антовски.
Дел од проектот беа и средби на повеќе засегнати страни – земјоделци, бизнисмени и невладиниот сектор. Целта е да се поттикне соработка и развој на вакви бизниси.
