Тутунски комбинат АД Прилеп со „нула“ извоз за првиот квартал
Во првиот неконсолидиран финансиски квартален извештај објавен на Македонска берза Тутунски комбинат АД Прилеп бележи пад на продажбата, но најмногу се извојува тоа што за јануари, февруари и март годинава немаат никаков извоз или приходи со продажба во странство. Тоа е неверојатен пад од околу 350 илјади евра кои биле остварени во истиот период за 2016-та.
Тутунски комбинат АД Прилеп единствени оперативни приходи има од домашниот пазар кои изнесуваат нешто над 35 милиони денари. Доста неповолни се и финансиските расходи, па така „Тутунски“ за првите три месеци годинава за камати има платено над 180 илјади евра.
Оперативните расходи на Тутунски комбинат АД Прилеп во К1 2017 достигнаа 86,6 милиони денари што е за 4 милиони денари помалку потрошени средства во однос на истиот период лани, а разликата е добиена кај услугите со карактер на материјални трошоци кои сега изнесуваат 5,6 милиони денари. Речиси идентично како лани Тутунски троши по 636 илјади евра за вработените за три месеци.
Крајниот резултат на Тутунски комбинат АД Прилеп повторно е загуба и таа изнесува 58.485.000 денари што е речиси идентично како и во ланскиот прв квартал од годината.
Тутунски комбинат АД Прилеп е компанија која подолго време се обидува да се стабилизира и да оствари поголема продуктивност и ефикасност. Во таа насока помогна партнерството со интернационалниот тутунски бренд Филип Морис, но се уште се потребни многу чекори за да се дојде до поголема профитабилност и максимална искористеност на квалитетот на македонскиот тутун.
