Иако праската е исклучително трајно овошје, кое главно се конзумира свежо, сепак од плодовите со полош квалитет, можете да направите деликатесна ракиија.
„Прасковата“ ракија е ракија добиена со дестилација на проферементирана комина од свежи праски или шира од праски, со или без коски, така што мирисот и аромата на дестилатот потекнуваат исклучиво од дестилираните сировини. Овој вид овошје зрее од мај до октомври. Една петтина од родот на праски, најчесто се употребува за производство на оваа вкусна ракија.
Пред ферментација задолжително требa да се отстранат коските
За преработка и добивање на ракија, главно се користат презреани и други плодови, кои неможат да се потрошат во свежа состојба. За овој вид овошје, карактеристично е тоа што, коските често пати се лесно кршливи, додека нивната срцевина е горчлива поради присуството на глукозид амигдалин. Со цел, во ракијата да не преминат премногу производи од разградувањето на амигдалинот, кои се многу штетни за човечкото здравје, како на пример цијановодородна киселина и бензалдехид, пред ставање на праските на алкохолна ферментација, коските треба да се извадат, а мезокарпот треба да се испасира или изгмечи.
Ако плодовите се многу лоши, се препорачува закиселување на комината
Ако праските се собрани од земја и се во лоша состојба, за да се спречат несакани активности, се препорачува закиселување на комината. Соодветно подготвениот раствор, се додава во комината постепено, садот за ферментација се полни, со цел да се изврши правилно мешање и хомогенизација. Исто така, препорачлива е употреба на селектиран вински или пивски квасец, како и сув квасец. На тој начин, се постигнува брзо и чисто варење, што поволно влијае на квалитетот на ракијата, како финален производ. Оптимална температура на варење е 18°C.
После дестилацијата, прасковата ракија треба да одлежи една година
После завршувањето на алкохолното вриење, на ред е дестилацијата, со задолжително издвојување на споредните фракции. Средната фракција, треба да има јачина од 60% алкохол. Целосен потенцијал, прасковата ракија достигнува, после одлежување од една година, односно кога ќе се хармонизираат сите нејзини состојки. Во тој период, потребно е постепено разредување на ракијата со дестилирана вода, се до концентрацијата која е оптимална за крајниот производ, а тоа е 45% алкохол.
Чување во садови кои не пуштаат боја
Прасковата ракија, главно се конзумира како безбојна, така што во текот на одлежувањето се чува во садови кои не пуштаат боја (стакло, керамика). Ракијата добиена само од една сорта праски е со послаб квалитет, во споредба со оние ракии добиени од повеќе сорти (ферментираат заедно или посебно добиени дестилати кои се мешаат во соодветен однос). Зависно од количината на шеќер и влијанието на коските, од 100 кг праски, може да се добијат 7,6 до 16 литри 45% ракија од праски.
Валентина Соколовска
за ЗЕЛЕНА БЕРЗА
