Со доделување на награди за најдобрите производители на млеко, Бимилк го одбележа „Денот на фармери рекордери на Бимилк“, настан што компанијата традиционално го организира во чест на своите фармери кооперанти што во изминатата година забележале рекордни резултати во производството на сурово квалитетно млеко.
На „Денот на фармери рекордери“,Бимилк им додели признанијана најуспешните фармери за нивната професионалност, посветеност во работата и активен придонес во одржувањето успешна соработка со млекарницата. Наградите што беа доделени се во согласност со високите стандарди за квалитет на Бимилк и се доделуваат во повеќе категории:испорака на најголема количество млеко за комерцијални и за семејни фарми, најдобар микробиолошки и хемиски квалитет на млекото, повторно во категоријата комерцијални и семејни фарми, како и специјални признанија за најстариот, најмладиот и најлојалниот фармер на Бимилк.
Пред присутните гости свое обраќање имаше генаралниот директор на Млекара АД Битола Ѓорѓи Петрушев.
„Блиската соработка и поддршка на млеко производителите, која опфаќа вложувања во современа опрема и технологија за преработка на млеко, едукација, поддршка при набавка на сточна храна, механизација и опрема, па сè до иницирање стимулативни мерки за развој на сточарството, отсекогаш била и ќе биде еден од главните стратешки приоритети за нашата компанија. Затоа, денес, овде сме за да им одадеме почит и признание на најдобрите од најдобрите, оние што остваруваат рекорди во производството на сурово млеко на територијата на цела држава и оние што придонесуваат Бимилк веќе 6 и пол децении да испорачува квалитетни производи што ги задоволуваат потребите, но и ги надминуваат очекувањата на повеќе од еден милион потрошувачи во земјата“.
Со цел да се подигнат производството и квалитетот на сурово млеко во државата, Бимилк континуирано и сериозно вложува во растот на основната суровина во млечната индустрија од сопствениот финансиски потенцијал, но и постојано иницира дискусии и покренува иницијативи со своите кооперанти и со надлежните органи за обезбедување начини за понатамошно унапредување на квалитетот на суровото млеко.
„Ова е добар повод е само да се дружиме, туку и да размениме идеи мислења, да видиме до каде стигнавме и уште подобро да одиме напред и заедно да се соочуваме со предизвиците со кои се соочуваат бизнисите. Како што во минатото ги поддржувавме фармерите, така со уште поголем интензитет ќе ги поддржуваме и во иднина оти имаме заеднички интерес, а тоа е постојано да го подобруваме квалитетот на млекото“, рече Петрушев во изјавата за медиумите.
На настанот свое обраќање имаше и Министерот за земјоделство, шумарство и водостопанство, г. Љупчо Николовски, кој ги афирмираше позитивните практики на Бимилк во насока на развој на севкупното млеко производство во земјата.
„Млекопроизводството како сточарска гранка е еден од поважните сегменти во агро индустријата и затоа е од посебен интерес во креирањето на владините политики. При подготовката на мерките за овој сектор посебно внимание посветуваме на примарното производство, подобрувањето на квалитетот на суровото млеко и, секако, на поттикнувањето на млечната индустрија. Но, во целиот овој процес од особено значење е и генетскиот потенцијал на добитокот. За таа цел, во годинешната Програма за рурален развој значително ја зголемивме финансиската поддршка за мерката за набавка на приплоден добиток и за оваа намена одвојуваме близу 1,5 милиони евра. Оваа мерка е важна за подобрување на генетскиот потенцијал, што во најголема мера ќе влијае и врз квалитетот на финалниот производ. Особено ме радува што во Македонија постојат вакви општествено одговорни компании како Бимилк, кои даваат особен придонес во подигнувањето на јавната свест и во развојот на земјоделскиот сектор“, истакна Љупчо Николовски, Министер за земјоделство, шумарство и водостопанство.
Кирил Небрежанец, фармер од Прилеп доби признание за најдобар млеко производител во категоријата на комецијални фарми. Дневно од својата фарма произведува над 4000 л млеко.
„Благодарност на Бимилк за почитта ко фармерите . Имаме сигурен откуп и сигурна наплата , нешто што не води многу напред. Во услови кога млекото е дефицитарен производ се стремиме за зголемено производство на млеко. Со аплицирање за набавка на нови јуници производството на млеко ќе се зголеми од 20 -30%.
Со успешната соработка со повеќе од 1.000 фармери од цела Македонија, дневната преработка на над 140.000 литри млеко или годишниот откуп од околу 40 милиони литри млеко, Млекара АД Битола е неприкосновен лидер на млечниот пазар, а токму постигнувањата и грижата кон своите кооперанти, во голема мера, придонесуваат да се одржи постигнатиот стандард, како и бренд со врвен квалитет.
Павлина Јовановска
