РЕАКЦИЈА
Не постои законски дефиниран рок во рамки на една календарска година за спроведување на вакцинацијата против болеста антракс од страна на ветеринарните друштва со кои Агенцијата за храна и ветеринарство има склучено договори за спроведување на Годишната наредба за здравствена заштита на животните. Тоа е работа на договор меѓу нив и сточарите, а ова треба да го знае ВМРО ДПМНЕ која со Агенцијата за храна и ветеринарство раководеше цели 11 години, а која со денови, во стилот на шпанска серија без крај, ја дезинформира јавноста и пласира невистини во однос на болеста антракс.
Вакцинацијата против оваа болест која се спроведува секоја година е веќе реализирана од страна на некои ветеринарни друштва, а добитокот во 22 дистрикта, како што неосновано обвинува членот на Извршниот комитет на оваа партија, Цветан Трипуновски, не е оставен невакциниран од антракс бидејќи Трипуновски, или неговиот брифер, во изминативе 11 години требаше да научат дека зависно од производителот, имунитетот на вакцината е најмалку една година и повеќе.
За жал, не научиле ниту дека Агенцијата за храна и ветеринарство согласно законите нема обврска да ја известува јавноста за појавата на болеста, туку веднаш, навремено да ги преземе сите мерки за заштита на добитокот и на населението. А тоа е сторено.
Со почит,
Агенција за храна и ветеринарство
