Ќе се санира дел од каналот за наводнување кон Војшанци

Каналот за наводнување од селото Пепелиште кон селото Војшанци, Неготинско е оштетен и ќе започне негова санација, информира директорот на АД Водостопанство, подружница „Тиквеш“ од Кавадарци, Љубе Димов.

– Станува збор за оштетен дел од каналот во должина од дваесетина метри. Екипата за санација утре ќе започне со работа и ќе го приспособи каналот за наводнување во најкус можен рок. Според моите сознанија во тој дел лозовите насади се веќе полеани и во моментов немаат потреба од наводнување. Дваесетина земјоделци кои одгледуваат зеленчук и кои имаат итна потреба од вода за наводнување ќе ја добијат, за да не се исушат нивните земјоделски култури, соопшти Димов.

Според него, станува збор за најстариот дел од каналската мрежа во Тиквешијата.