Градоначалникот на Општина Росоман ги повика земјоделците да пријават штети од пролетниот мраз

Градоначалникот на Росоман, Стојан Николов објави јавен повик, со кој се повикуваат земјоделците, да пријават штети од пролетниот мраз. Повикот е врз основа на законот за локална самоуправа и статутот на општината.

Во него се појаснува дека можат да се пријават сите оние коишто имаат материјални штети на земјоделски насади, предизвикани од атмосферската непогода – мраз, којашто ја зафати територијата на општината, во деновите 12 и 13 март и 13 и 14 април 2022 година.

-Во процената нема да се земат предвид насади што се помлади од три години, како и насади што не се обработуваат. Исто така нема да се врши процена на насади, кои се веќе осигурани за 2022 година, во осигурителни компании, стои во јавниот повик.

Пријавувањето на штетите започнува денеска и ќе трае до крајот на мај.

(МИА)