Битиќи: Ќе има антикризни мерки, но таргетирани
Мерките ќе бидат за најзагрозени компании и целни групи.
– Ќе има антикризните мерки но тие нема да бидат сеопфатни, вели министерот за финансии Фатмир Битиќи.
Според министертот, мерките ќе бидат таргетирани за најзагрозени компании и целни групи.
Обвини и дека трговците и останатите дејности во голем дел користат манипулации со цените и побара реакција од инспекциските служби.
– Компаниите кои ги зголемија цените изминативе денови ќе се соочат со соодветен одговор од државните институции, бидејќи нивното однесување во изминати три дена е некоректно и неморално, рече вицепремиерот за економски прашања, координација на економските ресори и инвестиции во одговор на новинарско прашање за воведувањето на антикризни мерки.
– Со особено внимание следиме што се случува овие три дена на слободниот пазар. Одредени компании се однесуваат некоректно, неетички и неморално на кон зголемување на цените. Тоа набрзо ќе наиде на одговор од страна на институциите. Не можеме да прифатиме дека цена, за 24 часа може да порасне за 20 отсто кога производствената цена не може да порасне 24 часа за 20 отсто. Сметам дека тоа е само манипулација којашто ја прават кон нашите граѓани и за тоа секако соодветно треба да реагираат инспекциските служби. Јас очекувам набргу извештај од инспекциските служби со мерки за сите коишто тоа го имаат направено, рече Битиќи, кој денеска присуствуваше на отворање на Саем за вработување и кариера во седиштето на Младинскиот ресурсен центар „I Can“ во Гостивар.
