Крушево полно со гости за Велигденските празници

Крушево е веќе резервирано за Велигденските празници. Исполнети се околу 90 насто од капацитетите со гости и посетители. Градот располага со околу 1000 легла, од кои 400 во хотелското и 600 во приватното сместување.

– Исполнети се речиси 90 насто од капацитетите во Крушево, како во хотелите, така и во сместувањето во индивидуалните куќи. Се бара место повеќе. Има голема раздвиженост во Крушево, се чувствува духот на празникот и на празнувањето. Интензивно работиме на промоција и на привлекување гости во нашето Крушево, вели Христоски.

Интересот на гостите и посетителите го потврдува и Жан Здравески-Шаое, угостител од Крушево.

– Имаме најавено гости, веќе 90 насто се букирани сместувањата. Еве се најавуваат и учесниците во параглајдинг-првенствата и очекуваме голем број посетители, вели Здравески.

Во градот веќе пристигнаа и нашинците и нивните гости од странство. Ангел Николов од Штип, кој живее во Малме, Шведска, го затекнавме со неговите гости во Крушево.

– По потекло сум од Штип. Живеам во Шведска, па донесов мои пријатели од Малме, Шведска да го посетат Крушево како единствен град каде влашкиот е еден од официјалните јазици. Имам влашко потекло па ги донесов пријателите да го видат и тој дел од Македонија, вели Николов.

– Јас сум од Шведска, а оригинално потекнувам од Германија. Патуваме. Знам за Крушево дека има влашко население. Ова ми е и прва посета на Македонија, вели Јасмин Фергусон.

Крушевчани за Велигден ги почитуваат обичаите и традициите и им посакуваат добредојде на сите гости и посетители.

Велигденските празници се голема најава за пролетната и летна сезона во највисокиот град на Балканот. Крушево годинава е и град на културата.https://nezavisen.mk/