![](https://zelenaberza.com.mk/wp-content/uploads/2023/06/ivk_8644a_800x533-780x470-1.jpg)
Николовски денеска во Ресен-Можности за модернизација на земјоделскиот сектор
Николовски и евроамбасадорот Дејвид Гир денеска во Ресен ќе ги претстават можностите што ги нуди ЕУ за финансиска поддршка на земјоделските задруги и модернизација на земјоделскиот сектор
Министерот за земјоделство, шумарство и водостопанство Љупчо Николовски и евроамбасадорот Дејвид Гир денеска во Ресен ќе ги претстават можностите што ги нуди ЕУ за финансиска поддршка на земјоделските задруги и модернизација на земјоделскиот сектор во Македонија. На настанот ќе се обрати и градоначалникот на Ресен, Јован Тозиевски.
Амбасадорот Гир и министерот Николовски ќе се осврнат на перспективите што Европската Унија им ги носи на земјоделците преку поддршка на задругите и поттикнување одржливи практики. Македонската асоцијација на земјоделски задруги и Македонската развојна фондација за претпријатија ќе ги презентираат инвестициите во развојот на руралните области и развојот на еколошки практики што им помагаат на земјоделците подобро да одговорат на барањата на глобалниот пазар.
-Земјоделците се соочуваат со предизвици како што се влијанијата на климатските промени врз биодиверзитетот, порастот на населението и промената на навиките во исхраната. Тие исто така постојано одговараат на барањата во однос на промените на навиките во исхраната и на променливите ставови и очекувања на луѓето. Финансиската поддршка од Европската Унија им помага да се соочат со овие предизвици и да се зачуваат живописните рурални области и квалитетните земјоделски производи, се наведува во најавата за настанот.
Презентацијата се одржува по повод Меѓународниот ден на задругите, наречен #CoopsDay, кој се одбележува секоја прва сабота од месец јули, од 1923 година наваму. Оваа година се одбележуваат 100 години од задругарското движење и значајниот придонес на задругите во глобалната економија, како и нивната улога во градењето на поодржлива иднина.Во моментов се спроведуваат три проекти финансирани од ЕУ во делот на македонското земјоделство: Зајакнување на управувањето со земјоделските задруги за подобрување на конкурентноста во земјоделскиот сектор (Competitive Agri – COOPS), Развој на модерно и одржливо земјоделство (AGROSMART) и Модернизација на советодавните услуги за операторите во земјоделството во Македонија.