СДСМ-Растат платите и пензиите
Со новиот Општ колективен договор, околу 130.000 вработени во јавниот сектор од септември оваа година ќе добиваат плати зголемени за 10 отсто.
СДСМ преку Владата и парламентарното мнозинство што ги предводи, останува посветена на унапредување на економскиот стандард на сите граѓани, истакна на прес-конференција, портпаролката на СДСМ, Богданка Кузеска.
Покрај ова, како што наведе, до крајот на годината ќе им се исплати и регрес за годишен одмор во висина од 10.000 денари.
„Со Општиот колективен договор, потпишан по цели 15 години се обезбедува и нова методологија за постојан раст на платите во јавниот сектор, што повеќе никогаш нема да зависи од нечија полиитчка волја. Истовремено, постигнат е договор и со вработените во Управата за јавни приходи. Веќе со јулската плата, 900 лица вработени во Управата ќе добијат зголемени плати за 30 отсто. Овие зголемувања ќе влијаат и на растот на просечната плата која што сега е на ниво од над 36.00 денари“, рече Кузеска.
Портпаролката потсети дека во септември, во согласност со законот, следува ново зголемување на пензиите, кое е проектирано на околу шест отсто.
Со септемвриската пензија, рече Кузеска, 330.000 пензионери ќе имаат повисоки месечни примања.
Таа заклучи дека ова е уште една потврда за успешноста на економските мерки и политики на Владата предводена од СДСМ – инфлацијата се намалува, а платите и пензиите растат.
