Агро бизнисБез категоријаВести
Ноќеска земјотрес на повеќе места во југозападна Македонија, епицентарот во Преспа
Земјотресот, според Сеизмолошката опсерваторија, бил со јачина од 3,8 степени според Рихтеровата скала, а бил почувствуван во Охрид, Струга, Ресен, Битола и Кавадарци
На триесетина минути по полноќ ноќеска бил почувствуван земјотрес на повеќе места во Охридско-преспанскиот регион. Земјотресот, како што информираа од Сеизмолошката опсерваторија, бил со јачина од 3,8 степени според Рихтеровата скала, а епицентарот бил во подрачјето на Преспа. Регистриран е на 120 километри јужно од Скопје.
-Телеметриската сеизмолошка мрежа на Република Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, вечерва 12.01.2024 година во 00 часот и 32 минути регистрираше земјотрес чиј епицентар се наоѓа 120 km јужно од Скопје, во епицентралното подрачје Преспа, со Рихтерова локална магнитуда ML3.8.
Според досегашните податоци со кои располага опсерваторијата, земјотресот е почувствуван во Охрид, Струга и Ресен со интензитет од IV степени според Европската макросеизмичка скала, во Битола, Кавадарци и околината со интензитет од III степени според истата скала. Освен вознемиреност кај граѓаните, според првичните податоци, материјални штети не се пријавени.
