Почна манифестацијата „Преспански јаболкoбер 2024“
Во петок, според традицијата, во Преспа ќе биде откинато првото јаболко од годинашниот род.
Со театарската претстава „Златка и трите мечки“ и со драмската претстава „Ум со ѓум“, вчеравечер, во Ресен почна традиционалната манифестација „Преспански јаболкобер 2024“.
Според програмата, вечерва, во киносалата во Ресен ќе биде отворена уметничката изложба „Низ четката на преспанските уметници“, а веднаш потоа членовите на драмското студио „Престиж“, кое работи во рамките на Домот на културата „Драги Тозија“ – Ресен, ќе ја одиграат претставата „Маѓепсаното момче“.
Од Општина Ресен најавија презентација на производи од јаболка, на штандови, која ќе се одржи утре напладне, на градскиот плоштад, а во петок, според традицијата, во Преспа ќе биде откинато првото јаболко од годинашниот род.
Во рамките на манифестацијата „Преспански јаболкобер“ ќе се одржат и повеќе концерти и спортски манифестации.
