Видео-На нивите зрее зеленчукот, но земјоделците се жалат, нема кој да го собере

На нивите зрее зеленчукот, но земјоделците се жалат, нема кој да го собере, а сушата дополнително им ја намалува родноста. И наместо надеж за поевтино на пазарите во септември, тие велат дека цените тешко ќе паднат објави Телевизија 24

Пиперката ајварка годинава ќе биде вистински луксуз за граѓаните. Откупната цена за прва класа е 45 денари, што значи дека на зелените пазари и во маркетите ќе се продава по околу 100 денари за килограм. И доматите веќе надминаа 100 денари. Земјоделците предупредуваат, сушата ги намали приносите, а високите трошоци за производство и големите трговски маржи дополнително ја пумпаат цената.

Ристо Велков е среде период кога во струмичкиот регион веќе се прибираат вторите, есенските култури, а најзастапена е индустриската пиперка. И покрај тоа што се зголемува потребата за зеленчук, производството се намалува. Според земјоделците, ќе има количини и за домашниот пазар и за индустријата, но ретко кој ќе прави ајвар, бидејќи цената на суровината е превисока.

И покрај ова, од Министерството за земјоделство постојано тврдат дека годинава откупната цена е повисока од лани и најавуваат контрола на откупот. Од друга страна, агрометеоролозите предупредуваат дека високите температури и недостигот на наводнување дополнително го влошуваат производството. Загрозени се сите култури, од градинарските до лозјето.

Иако сите очекуваат поевтин зеленчук, производителите предупредуваат – со вакви услови нема простор за намалување на цените. Напротив, велат дека оваа есен ќе се брои секоја тегла зимница.