Откупувачите си поигруваат со тутунарите, покрај ниски откупни цени пресметуваат и кало од 3 до 5 отсто, се жалат производители
На 10 тони тутун, сакаат да му пресметаат кало од 5 проценти, тоа значи како што вели, да го „скинат“ за 500 килограми тутун. или во пари вклучувајќи ја и субвенцијата, помалку 250.000 денари.
Тргни – застани, вака почна откупот на тутунот од новата реколта и со многу незадоволство од ниските цени по класи на тутунот. Тутунарите се жалат дека минатата недела Прилепскиот тутунски комбинат запрел со откупот (само два дена откупувал), иако само тој и компанијата „Кавекс“ почнаа да откупуваат тутун на 18 ноември. Значи сега само „Кавекс“ откупува оти и другите осум компании – откупувачи најверојано ќе го чекаат крајниот рок 15 декември. Стартот на откупот е лош, велат тутунари иако тутунот е калапен и спакуван во пакети. Тутунарите не се задоволни од откупната цена, особено големите производители кои секоја година произведуваат квалитетен тутун.
Голем производител на тутун од прилепско за nezavisen вели дека на 10 тони тутун, сакаат да му пресметаат кало од 5 проценти, тоа значи како што вели, да го „скинат“ за 500 килограми тутун. или во пари вклучувајќи ја и субвенцијата, помалку 250.000 денари.
„Откупот почна со пресметување кало од 3 до 5 проценти. Тоа значи пониска просечна цена од ланската година. Ако прва класа е 420 денари за килограм со одбиток од 5 проценти цената е 399 денари за килограм. Со оваа математика на 1.000 кг. предаден тутун со 5 проценти кало доаѓа за исплата 950 кг. тутун. Ова значи дека ти ги скусил парите за 50 кг. тутун, а тоа е 340 евра. Имам спремено 150 пакети, ама за да ме ‘сечат’ со кало не давам. Откупувачите сакаат ние вистинските тутунари да ги покриеме оние производители што носат ѓубре на откуп наместо тутун“, вели тутунопроизводител познат на редакцијата кој произведува над 10 тони тутун годишно подолг период нанзад.
Тутунарот од Прилеп додава дека и годинава откупувачите притискаат тутунарите да го предадат тутунот со пресметани одбитоци од 3 до 5 проценти, па вели „откупувачите и оваа година сакаат да ни ја јадат потта, само првиот ден од откупот не пресметуваа кало“.
Тутунарите од Прилепско, пак бараат 600 денари за килограм тутун, велат дека само оваа цена може да ги надомести трошоците на професионалните производители на тутун.
„Килограм тутун треба да биде 600 денари, плус премијата 100 денари, така некако ќе излеземе на крај. Две ливчиња тутун е една пакета цигари, а една кутија цигари најевтината е 150 денари. Срамота е кило тутун да биде 300 денари како лани, ако биде како лани не го работиме повеќе тутунот. Да биде минимум 10 евра за народот да го работи тутунот“, вели тутунопроизводителот Роберт Шаркоски од село Обршани во изјава за „Зелена берза“ https://www.facebook.com/reel/25385711861039764.
За оваа цена тутунарите имаат оправдување и велат дека една табла јајца е 400 денари, а тутунот е еден од најтешките култури за произведување.
Прилепскиот тутунски комбинат на 18 ноември отвори 34 откупни пункта во државата со 37 ваги и кажа дека ќе исплаќа двапати неделно, во вторник и во петок, но многу кусо потоа само по два дека престана да откупува. Според тутунарите откупот во Прилепски тутунски комбинат ќе продолжел на 2 декамври, но и тоа засега не е потврдено.
„Имаме цени највисоки од сите откупувачи – 420 денари е за прва, 360 за втора и 300 денари за трета класа тутун. Доколку откупувачите и тутунарите се договорат за повисока цена, ние тоа може да го исплатиме и дури и ретроактивно за откупените количества тутун“, изјави на самиот почеток на откупот Александар Алексоски, директор на Тутунски комбинат-Прилеп.
Од Сојузот на земјоделски здруженија велат дека „не знаат зошто откупувачите молчат и тактизираат“ и не ги отвораат вратите за откуп од ноември.
„Досега никоја од компаниите не известила кога ќе почне со откупот, ниту знаеме зошто молчат и тактизираат. Тутунарите почнуваат да се прашуваат што се случува, се создава притисок, неизвесност“, вели Кире Ристески, претседател на Сојузот на земјоделските здруженија на почетокот на откупот.
Годинашнава реколта тутун се проценува како многу квалитетна, и се смета дека собрани и подготвени за откуп се од 22.000 до 24.000 тони.
Во март кога се потпишуваа договорите за годинашната реколта откупувачите понудија цени кои се движеа од 414 до 420 денари за прва, од 312 до 360 за втора и од 250 до 300 денари за трета класа. Сојузот на земјоделски здруженија побара 510 за прва, 450 за втора и 390 за трета класа, но откупувачите не се согласија на овие цени.
Лани просечната цена на откупот на тутунот изнесуваше 374 денари по килограм.
Откупот на тутунот официјално трае до крајот на февруари.
текст Анета Блажевска
