Приведена поранешната мисица по бркањето на „лудите крави“ – Јулија ги спречила инспекторите да стигнат до добитокот

Вчерашната акција на Агенцијата за храна и ветеринарство (АХВ) за заплена на неконтролираниот добиток во Крива Паланка кулминираше со приведување на 27-годишната Јулија Ѓорѓиевска. Таа беше лишена од слобода откако пружи активен отпор и ги попречи службените лица во спроведувањето на законот.

Според официјалните информации од Министерството за внатрешни работи, Ѓорѓиевска била приведена околу 09:35 часот во близина на градскиот базен, каде инспекторите се обидувале да ги заловат кравите кои со години претставуваат опасност за локалното население. Наместо соработка, полицијата се соочи со физички отпор – Јулија трчаше по стадото обидувајќи се да го пренасочи кон планината, директно спречувајќи ги вработените од АХВ да го извршат решението за одземање на животните.

Овој инцидент е само продолжение на агресивното однесување на семејството Ѓорѓиевски. Имено, во декември минатата година, се случија насилни сцени при кои беше приведена Јулија и нејзиниот татко, а тогаш беше објавено дека ќерките со нокти гребеле полицајци по лицето. Поради ваквото однесување и малтретирање на сожителите, Обвинителството тогаш бараше и доби мерки притвор.

Жителите на Крива Паланка и селото Жидилово веќе подолг период алармираат дека околу 500 грла добиток на ова семејство се движат без никаква контрола, уништувајќи приватни имоти и поседи. И покрај вчерашната интервенција и приведувањето на Ѓорѓиевска, на терен беа заловени само десетина крави, додека остатокот од стадото и понатаму слободно талка по ридовите.

Против Јулија Ѓорѓиевска, по целосно документирање на случајот, ќе биде поднесена соодветна кривична пријава за спречување на службено лице во вршење на службено дејствие.