Католичките верници го слават Божик
Католиците во светот денеска го слават Божик, но оваа година без големи семејни собири поради пандемијата на коронавирусот. Празникот што го слави раѓањето на Исус, 25 декември, според грегоријанскиот календар, Божик е еден од најголеми христијански празници.
Милиони верници беа принудени да ги откажат или ограничат прославите на тој празник во време кога голем број земји воведуваат нови ограничувања. Во Витлеем, родното место на Исус Христос, мисата се одржа претходниот ден без верници и се пренесуваше преку интернет.
Католичките верници и дел од православните христијани, кои се водат според Грегоријанскиот календар денеска го одбележуваат Раѓањето Христово – Божик. Традиционално, во државава централната прослава по повод празникот се одржа во Католичката црква „Пресвето Срце Исусово“ во Скопје, каде синоќа имаше божикна света литургија.
На литургијата присуствуваа претседателот Стево Пендаровски со сопругата Елизабета Ѓоргиевска, директорот на Комисијата за односи со верските заедници и религиозни групи, Даријан Сотировски, како и помал број верници во однос на изминатите години согласно протоколите за заштита од Ковид-19.
Внатре во катедралата имаше определен број свештени лица и верници, а надвор во дворот беше поставен видео бим со цел верниците кои не можеа да влезат внатре да ја следат литургијата. Задолжително беше носењето маски и одржувањето потребно растојание меѓу присутните.
Бискупот скопски и епарх струмичко-скопски Киро Стојанов, честитајќи им го празникот Божик на католичките верници на литургијата ја прочита божикната проповед.
