Ловџиите ќе останат без ловни терени откако Шара ќе се заштити

Оттаму сметаат дека ако се донесе закон преку кој би се заштитила планината, тогаш сите ловџии кои ловеле, а истовремено ја одржувале бројката на загрозени диви животни на планината, ќе останат без ловните терени, а со тоа ќе се намали бројот на дивечот. 

Стојче Ѓорѓески секретар на ловечкото друштво Љуботен, вели дека и тие како ловџии треба да бидат дел од националниот парк. Без нив ќе има зголемено ловокрадство, а тоа го докажала бројката кога на Шар Планина немало толку ловечки друштва, на планината владеело самоволие.

-Работава е што ние како ловечко друштво многу сме придонеле на пример на ловните терени што ги имаме да имаме зголемен број на дивеч, класичен пример е од 2012 кога сме ги зеле овие ловни терени под концесија. Ние како ловечко друштво што ги имаме терените на пример имавме 150 диви свиње, а сега имаме 450 диви свиње, затоа што ние сме го спречиле ловокрадството, значи ние имаме поголема контрола, вели Стојче Ѓорѓески секретар на ловечкото друштво Љуботен.

-Формирање на национален парк ќе значи дека ловните терени што ќе ги земе националниот парк ќе станат државни ловишта и нема воопшто да има контрола. Пример е државното ловиште Лешница на Шар Планина, со кое се надевавме дека ќе се зголеми бројот на дивите кози, но сосема обратно дивите кози многу се намалија, велат од ловечкото друштво Љуботен.

Оттаму додаваат дека не се против Шар Планина да биде национален парк, но постапката апелираат требало и треба да биде транспаретна и тие како концесионери да бидат вклучени во тој процес, за да не изгубат ловџии кои дел се вработени како ловџии, но и самиот дивеч кој од година вгодина поради нивната активност се зголемува.

Освен од ловните друштва и од Ловечката федерација на Македонија реагираа по објавата дека владата дала зелено светло Шара да биде прогласена за национален парк. Оттаму истакнаа дека штета е што владата одлучува без да бидат консултурани засегнатите страни, а во предвид не се зело и мислењето од Министерството за земјоделство шумарство и водостопанство, од каде не се соогласуваат со постапката за прогласување на Шара за национален парк.

За разлика од ловните друштва, екологистите но и невладините организации кои се дел од Платформата Пријателите на Шара ја поздравија одлуката за прогласување на Шара за национален парк, иако како што истакнаа таа е задоцнета, затоа што иницијативата ова подрачје да биде заштитено е стара две децении.

Шар Планина на страната на Косово  прогласена е за национален парк пред 30 години. Ако се заштити и на македонската страна, овој планински предел би преставувал најголем заштитен појас во Југоисточна Европа.

З.Димовски