Со Закон ќе се регулира плаќањето на акцизи за тутунопроизводителите

Тутунските компании повеќе нема да можат да акумулираат залихи кај дистрибутерите, а притоа да одбегнуваат плаќање на акцизи. Новите измени во Законот за акцизи, кој е во Собраниска процедура, ќе забранат производителите и увозниците да таложат залихи кај дистрибутерот пред поскапување на цената на цигарите со цел да избегнат плаќање на новите акцизи со што директно би се оштетил јавниот буџет.

Членот 14 од овој законот предвидува при промена на малопродажната цена на тутунот, производителот и увозникот да направат попис и записник на затечените залихи во своите складови, како и во магацините на увозникот. Овластениот дистрибутер прави попис во својот склад, а записникот го доставува до Царинската управа.

 

Откако ќе ја пресметаат разликата од старата до новата акциза на затечената залиха, производителот и увозникот, барање за доплата на акциза доставуваат до Царинската управа. Доплатата ќе треба да ја извршат во рок од 30 дена. Оваа измена на Законот за акцизи се носи во согласност со европската регулатива за спречување на шпекулативните залихи на цигари.

Согласно законските измени од 2013-тата година, зголемувањето на акцизите на цигарите се одвива постепено во период од 10 години. Од 1 јули годинава па се до 1 јули 2023 година, акцизата ќе расте за 0,20 денари по парче во секоја година.