Стрежевската акумулација ќе ги задоволи потребите за вода

(Oвој напис е објавен на: February 25, 2017)
Пелагониските земјоделци што за наводнување  ги користат водите од хидросистемот „Стрежево“, годинава ќе можат да ги задоволат сите потреби. Потребната вода за расадување и поникнување на пролетните култури ја добија и во април, бидејќи  овој месец имаше високи температури. За годинешната реколта, рокот за пријавување на површини по култури истекува за една недела, а „стрежевци“ се оптимисти  дека годинава површините што ќе се наводнуваат ќе бидат поголеми.
strezhevskata akumulacija kje gi zadovoli potrebite za voda
– Ако лани имавме повеќе пријавени површини во однос на претходната година, оваа година очекуваме тој тренд да го продолжиме и да добиеме зголемување за 10 проценти на површини од 7- 8. 000 ха пријавени површини- рече Марјан Геровски, директор на ХС „Стрежево“.
За среќа, покрај тоа што оваа зима врнежите на снег беа далеку под просекот, акумулацијата „Стрежево“ е во одлична хидролошка кондиција.
– Во моментов во акумулацијата има 96,5 милиони м3 вода и земајќи предвид дека приливот е добар, очекуваме до почетокот на јуни да биде над сто милиони м3- рече Геровски.
Капацитетот на стрежевското езеро е 120 милиони м3 вода, а покрај земјоделците, водата се користи за потребите на индустријата и за градскиот водовод на Битола, со исклучително поволни цени- еден денар по м3 за наводнување во земјоделието, 5 денари на водата за пиење и десет денари по м3, за индустриските капацитети.