Земјоделците од Струмичко задоволни од откупните цени на пиперката „ајварка”

Откупната цена за прва класа пиперка во преработувачките капацитети се откупува од 30 до 35 денари за килограм, а втората од 20 до 25 денари.

Засега освен преработувачите, „ајварката” ја откупуваат и трговците во гајби по цена од 30 до 40 денари за килограм во зависност од квалитетот.

Според производителите ова е период кога се совпаѓа бербата на „ајварката” под пластеници и на отворено, а шпицот го очекуваат околу средината на месецот, кога масовно се подготвува ајварот.

– Задоволни сме од откупните цени и се надевам дека такви ќе останат. Иако, бербата од пластениците е доминантна, сепак некои производители почнаа и со берба на отворено. За неколку денови таа ќе се интензивира и очекувам да нема никаков проблем со откупот, рече Бончо Божиков, производител на „ајварка” од село Дабиле.

Инаку, од година во година производството на оваа пиперка се намалува, а годинава на тоа влијаеја и екстремно високите температури. Штети и намалување на приносите има кај оние производители кои навреме не ги наводнувале посевите, а според досегашните сознанија производството на „ајварката” е помало од лани за околу 10 отсто.https://kanal5.com.mk/zemjodelcite-od-strumichko-zadovolni-od-otkupnite-ceni-na-piperkata-ajvarka/a491006