Климатските промени нема да ги уништат пчелите, но ќе ја осиромашат трпезата

Климатските промени ќе имаат негативни последици по пчелите, но нема да ги уништат, туку ќе ја осиромашат трпезата, затоа што единствено пчелата во природата врши опрашување на многу билки, тврди пчеларот Бранко Тасевски од кумановско, кој пет децении се занимава со одгледување на пчели.

Сепак климатските промени си го земаат данокот, а пчелите се жртви.

Вели дека последните пет години пчеларите забележуваат дека поради климатските промени, и неповолните временски услови, варира приносот на мед.

„Сега би требало да имаме снег, но снегот го нема. Годините веќе не се како порано, нема таков принос, иако јас и моето семејство повеќе од 50 години се занимаваме со одгледување на пчели. Опасност до тој степен да ги снема пчелите мислам дека нема да има, но за човекот трпезата ќе биде посиромашна. Од област до област, од подрачје до подрачје има разлика. Но, ние пчеларите сме тука, и доколку им треба храна, доколку ги нападне штетник,  им помагаме на пчелите да преживеат“, додава Тасевски.

Вели дека во минатото пчелите претрпеле многу непогоди, а со тоа верува дека ќе ги преживеат и климатските промени.

Сепак, на медоносните пчели им се заканува појава на нови причинители на болести.

За ублажување на последиците од климатските промени потребно е засадување на автохтони медоносни растенија како што се: мајчина душица, оригано, лаванда, кориандер, анасон,  жалфија, рузмарин, слез, копар и други.

Според статистички податоци пласирани лани, во земјава се евидентирани над 4.135 пчелари и деловни субјекти кои одгледуваат 73.960 пчелни семејства или 2,8 кошници на квадратен километар, а годишно се произведуваат 688.000 килограми мед или околу девет килограмиг мед по кошница. Македонскиот граѓанин троши само 0,5 килограми мед годишно во споредба со жителите на Словенија или Грција кои трошат 1,2, односно 1,6 килограми годишно по глава на жител.

извор: Фактор