вестиВидео/интервјуа

Ако сакаме успех, политиката да ги тргне рацете од земјоделието, порачува земјоделецот Стеван Стојановски од Долна Чарлија

(Oвој напис е објавен на: јуни 1, 2018)

stevan

Стеван Стојановски (59) земјоделец од селото Долна Чарлија, е еден од поголемите производители на пченица, пченка, сончоглед и тутун во Пелагонија. Долна Чарлија пред две децении броела 370 жители, а сега во селото се останати само 120 и тоа претежно во поодминати години. Помладите го заобиколуваат земјоделието и повеќе го сакаат модерниот начин на живот „кафе на Широк сокак“, раскажува Стојановски  кој  сериозно е посветен на земјоделието. Неговото семејство обработува 25 хектари земјоделско земјиште во атарот на селото, дел во негова сопственост, а дел под закуп.

-Произведувам пченка од 40 до 70 тони во зависност од приносите, сончоглед  до 15 тони,  пченица од 60 до 70 тони,  а семејно, јас сопругата и синот произведуваме годишно  до 1500 килограми тутун, вели нашиот соговорник во разговор за „Зелена берза“.

-Ако се земе пресметката колку сум вложил финансии за производство на овие култури тутунот најповеќе се исплаќа да се произведува. Едно четиричлено семејство ако работи тутун може да призведе околу 4 тони, но трошоците се големи, иако лани имавме добри цени, вели Стојановски.

Овој  искусен земјоделец  предочува дека на секој земјоделец потребна му е добра земјоделска механизација и примена на добри агротехнички мерки за побогат род , како и тоа секоја активност да биде изведена на време.

-На земјоделците џебот им е плиток, ние имаме пари кога не треба. Еве на пример во месец март  треба да вложам одредена количина на средства, а ги немам. Пари  од родот ќе добијам во април, доцнам со работите и тоа ми се одразува на  приносите. Значи ако не е навреме сработено нема да имате добри резултати. Земјоделците имаат многу маки, зошто  парите што ги добиле,  претходно ги вложиле, вели Стојановски.

Овој земјоделец апелира до државата да води повеќе грижа за земјоделието и однапред една година да ја одреди откупната цена на пченицата, пракса насекаде во светот.

-Државата ни вели- ако не ви се исплаќа пченицата не ја произведувајте. Но овде во Пелагонија има огромни површини кои не може да се засадат само со пиперки и домати. Значи мора да има пченица и сончоглед. Како што државата става на секој производ номинална вредност  и во овој дел треба плански да настапува, да се каже една година однапред цената на пченицата, па кој сака да произведува пченица нека пресмета дали ќе му се исплати или не. Тогаш  и земјоделец ќе знае во што да вложи.  Така е насекаде во светот. Очигледно  државата се плаши да не загуби, критикува Стојановски.

Што се однесува до субвенциите и државните мерки за помош на земјоделците Стојановски апелира,  политиката да стои настрана од земјоделието.

-Државата мора да размислува за нов начин на финансиска поддршка на земјоделците, особено во делот кај помошта за млади земјоделци, зошто тоа е само на хартија. Помошта и распределбата на парите од државата за земјоделците мора да биде транспарентна,  вистинските земјоделци многу малку успеваат да земат нов трактор за разлика од оние кои фиктивно ги прикажуваат работите. Тука најмногу има поврзаност со политиката. Ако во земјоделието влезат вистински стручњаци што нема да ги интересира политиката, работите во земјоделието ќе тргнат на добро. Но, сметам дека тоа  е многу тешко, особено во Платежната агенција, вели Стојановски, раскажувајќи го своето лично искуство.

-Јас  шест години аплицирав за трактор и на шестата година го добив.  Ми рекоа- ако имаш некој млад земјоделец во семејството тој побрзо ќе добие трактор. Јас им вратив- имам син , но тој не оди на нива, бидете благодарни што земјоделието го работиме ние со побелени коси, раскажа искусниот земјоделец Стојановски, член на здружението „Зелена берза“, кој деновиве ја посети обуката „Колку чини моето производство“ , организирана од Здружението во просториите на „Синпекс“ Битола.

 

„Зелена берза“

 

 

Тагови

Валентина Соколовска

Зелена берза – Гласот на земјоделецот Заедно со Вас, драги земјоделци, ја создадовме „Зелена берза“, како Здружение на земјоделци, како начин на заедничка работа преку кој ќе стигнеме до нашите јасни заеднички цели: да се слушне гласот на секој земјоделец, да размениме искуства, да создадеме услови во кои ќе можеме успешно да работиме, а земјоделскиот труд да добие соодветен приход. „Зелена берза“, постои за Вас, да ве поттикне, да ве информира, но и заеднички со Вас да се избори за квалитетно и исплатливо производство, за производи кои гарантирајќи квалитет ќе обезбедат сигурност, стабилност и добар профит. Визијата на најголемото, невладино и непрофитно, земјоделско здружение во Р. Македонија – „Зелена Берза“ е да прераснеме во здружение со илјадници членови, здружение со големо влијание врз законските норми кои го регулираат земјоделието и здружение кое ќе му даде глас на секој индивидуален земјоделец. Грб во тешките времиња и земјоделски промотор во добрите. Нашата мисија е да го промовираме македонскиот земјоделец, да градиме партнерски односи со производителите и со трговците, да создадеме заедница на македонските производители на храна која ќе ги претставува и ќе се бори за интересите на современето македонско земјоделие, во државата и странство. Приклучете ни се, бидете дел од нас. Раскажете ја вашата приказна, актуелизирајте го Вашиот проблем, презентирајте ја Вашата идеја, понудете добри совети. Ние сме тука, да го пренесеме Вашиот збор, да преземеме активности и заеднички да креираме успеси, што ни е силно потребно, на сите нас, кои директно или индиректно, сме дел од земјоделието. Успехот во оваа гранка, е успех на животот, зошто здравата храна е еден од клучните фактори за здрав живот, а земјоделецот е неговиот најважен столб. И нашиот месечник е олицетворение на вредностите кои ги застапува Зелена берза. Делењето на бесплатни примероци има за цел да го зголеми опсегот на гласот на земјоделците, заедно да ги решиме децениските земјоделски проблеми, натежнати врз сите нас. Заедно да го продолжиме патот кој започнавме да го трасираме. Креирајте го Вашиот весник, според Вашите желби и потреби. Ние сме тука за Вас. Редакцијата на нашиот и Ваш весник, Ви стои на располагање за споделување на Вашата приказна, Вашите совети и Вашето искуство во земјоделието. Контактирајте не на телефон 071 207 021, преку електронска пошта [email protected] или на страната на ФБ / Зелена Берза Срдечен поздрав, Вашата Зелена Берза

Слични написи

Back to top button
Close