Димковски: Храна има и ќе има, но времето на евтина храна е минато

-Храна ќе имаме, како што отсекогаш сме имале. Цената на храната е покачена поради порастот на цената на ѓубривата, на нафтените деривати, но и на работната рака. Сето тоа влијае на ценат на крајниот производ, вели Трајан Димковски, поранешен министер за земјоделство и советник за Утрински брифинг.

Димковски информира дека производството на пченица кај нас расте, а се намалува увозот. Производството ќе расте уште повеќе, затоа што земјоделците поради порастот на цените ќе бидат заинтересирани да се занимаваат со одгледување на оваа житна култура. Што се однесува до увозот, тој коментира дека за пченица годишно сме потрошиле 15 милиони евра, што е многу малку споредено со увозот на чоколадо за што сме потрошиле 42 милиони евра.

-Лани имаме извезено 22 милиони тони јачмен што значи дека јачмен имаме доволно да ги задоволиме потребите на нашите фарми. Сега е поминато времето на евтина храна, па коментарите дека нема јачмен всушност значат дека јачменот годинава е поскап, а поскап е оти трошоците се зголемени, вели Димковски.

Државата интервенира со посебни фондови за помош на земјоделците за ѓубриво и гориво за земјоделците кои се занимаваат со одгледување сончоглед, а Димковски очекува дека оваа помош нема да биде само годинава туку ќе остане долгорочна. Тој додава дека освен што е зголемена површината на посеви зголемен е и приносот. Причината за тоа е што за земјоделците да влезат во системот на субвенционирање мора да испочитуваат одредени правила за регулирано производство.

Што се однесува до тутунот, кој е производ број еден во нашиот извоз, Димковски вели дека годинава ќе имаме добра реколта поради влажното време, а и ќе продолжи субвенционирањето, особено преку Програмата за рурален развој преку која ќе се субвенционираат и сушари за тутун.

Земјоделското земјиште ќе се дава под закуп, а може да се склучат договори за сите земјишта кои се водат во Катастар како земјоделско земјиште со исклучок на земјишта на кои се наоѓаат други капацитети или шуми.

Земјоделската дејност е несигурна и затоа се работи на нацрт закони за задолжително осигурување на земјоделските посеви, особено што и сега државата учествува со 60 отсто од сумата за осигурување на посевите, инфомира Димковски за Утрински брифинг.

По ребалансот на буџетот Димковски најавува дека ќе се ревидира и Интервентниот фонд преку кој 125 милиони евра годишно одат на субвенционирање на производство на месо со што континуирано се намалува увозот на месо и месни преработки.https://www.slobodenpecat.mk/video-dimkovski-hrana-ima-i-kje-ima-no-vremeto-na-evtina-hrana-e-minato/