Земјоделците од Овчеполскиот, но и од целиот источен регион интензивно ги платат стрништата, со што се подготвуваат за претстојната пролетна сеидба на нивите. Но, запалените стрништа деновиве направија и големи штети на останатите земјоделци. Билтенот на СВР-Штип денеска нотира неколку пожари, во кои има големи материјални штети од запалените стрништа.
Портпаролот на СВР-Штип, Гордана Панјотова информира дека вчера околу 12.00 часот на место викано Кривчева река, атар на Свети Николе настанал пожар со кој била зафатена површина од околу еден хектар лозје и стрниште. Пожарот е локализиран од страна на ТППЕ – Свети Николе.
-Вчера во периодот од 13.00-14.30 часот на место викано Суви Дум, атар на село Горобинци, Свети Николе настанале три пожари, со кои биле зафатени пет декари лозови насади и околу четири декари стрниште. Пожарот е локализиран од страна на пожарникарите од Свети Николе, вели Панајотова.
Голем пожар од вчера има на место викано Џуанец, во атарот на беровското село Двориште, со кој била зафатена поголема површина сува трева, ситен шумски отпад и грмушки, јасика и бор, опожарени биле и објекти сопственост на В.К. од село Двориште. Пожарот околу 20.30 часот се проширил и го зафатил место викано Дополовски колиби, кое е во близина на границата со Република Бугарија.
Панајотова вели дека во тек е гаснењето на овој пожар. Пожарникарите од источниот регион неколку пати алармираат дека штетите се големи, што се прават со палење на стрништата, а тие интервенциите мора да ги прават со застарените возила и опрема. Бараат на терен да излезат државните инспектори, коишто имаат ингеренции да ги казнуваат несовесните земјоделци, што ги палат нивите пред претстојната сеидба.
