Пилешките нагети обично имаат прилично лоша репутација – најчесто немате поим со какво месо се полнети, многу е веројатно дека содржат адитиви, а доколку не ви сметаат овие работи, тогаш можеби ќе ви смета тоа што за да се направат, некое животно мора да биде убиено. Но, овој нагет не е обичен бидејќи неговото месо беше „израснато“ во лабораторија.
Тоа што овој пилешки нагет е производ на лабораториска работа не значи дека тој е вештачки. Баш напротив, направен е од вистинско пилешко месо креирано во лабораторија со помош на клетки земени од жива кокошка.
„Чистото месо“, исто така наречено cultured meat, се произведува на тој начин што се одвојуваат клетки од животното преку биопсија, која е безболна за него. Клетките можат да бидат одвоени од било каде, дури и од пилешки пердув. Потоа на клетките им се додаваат нутриенти, со кои месото „расте“ во биореактор. Во случајот на овој пилешки нагет, нутриентите се од растително потекло.
„Готвачите се вистинските херои на овој подвиг, бидејќи тие ја диктираат количината на клетки која треба да биде ставена во месото за да биде што повкусно“, вели Виктор Санто, директор одделот за клеточна архитектура.
А каков е вкусот на пилешкиот нагет произведен од лабораториски одгледано месо? Според Лекси Савидес од порталот CNet, текстурата која му ја дава презлата на нагетот на Just (Сан Франциско) е иста како кај онаа од најголемите ресторани за брза храна, а вкусот на месото е изненадувачки добар и остава впечаток на пилешко месо кое се користи кај најголемите дистрибутери на храна во САД.
Доколку сакате да пробате пилешки нагет од „чисто месо“, тогаш ќе мора да почекате барем уште некое време. Ресторанот Just мора да добие дозвола од американската влада за производство и дистрибуција на месо произведено во лабораторија, но оттаму велат дека овој процес би требало да заврши пред крајот на оваа календарска година.
