Канцеларијата на АПРЗ во Карбинци не работи

Земјоделците во карбинско чекаат повторно да проработи канцеларијата на Агенцијата за поттик и развој на земјоделството, за да можат да аплицираат за субвенции. Од општината испратиле допис, но одговор се уште не добиле.

Земјоделците бараат канцеларијата да се отвори за да не мора да одат во Штип. Полесно ќе им било, а ќе заштеделе време и пари доколку аплицирале во матичната општина.

Од Агенцијата за поттик и развој на земјоделството велат дека работите со Карбинци биле поинаку договорени. Општината требало да обезбеди волонтери кои ќе бидат обучени од советниците за работа.

Дополнително од Агенцијата велат дека дневно работат со голем број на апликанти а имаат мал број на вработени поради што не можат да одговорат на барањата на земјоделците во карбинско. Поради истиот проблем и големиот интерес за субвенции, во штипската единица сега се пополнувале и апликации на земјоделци од светиниколско и радовишко.