Каракашев – Се случува хаос и грабеж на оризарите

ХАОТИЧНИОТ ОТКУП НА ОРИЗОТ И ГРАБЕЖОТ НА ОРИЗАРИТЕ ПРОДОЛЖУВА!, обвинува Ѓорги Каракашев, претседател на Националната земјоделска мрежа.

За жал и покрај сите обиди за институционално решение од страна на Национална земјоделска мрежа, а со директна поддршка на оризопроизводителите од Кочанскиот регион, до ден денешен немаме никакво решение околу хаотичните откуп на оризот. Одржаната трибина со оризопроизводителите со конкретни ставови и заклучоци безброј состаноци со конкретни предлози и иницијативи, конкретни одлуки од страна на надлежните институции и на крај никаков прогрес, ни решение на повидок. Од страна на МЗШВ се изготви производна цена за кг оризова арпа – 27 денари по кг. Следствено на тоа според Законот за земјоделие и рурален развој се дефинира заштитна цена од мин 25 % над производната цена, односно 35 денари по килограм оризова арпа. За жал во овој момент се откупува оризова арпа далеку под производна цена.

Надлежните во овој момент се комплетно инертни и не постапуваат согласно Законската регулатива. Како Национална земјоделска мрежа АПЕЛИРАМЕ под итно да се вклучат Земјоделскиот инспекторат, ресорниот министер Цветан Трипуновски и под итно да се спроведат одлуките на Владата односно да се изврши интервентен откуп од најмалку 3.000 тони ориз за стокови резерви, притоа запазувајќи ја законски пропишаната заштитна цена од 35 денари по кг. оризова арпа.

Истовремено бараме мерката за дополнителни субвенции од по 6 денари по кг. предадена арпа да важи од први октомври, па заклучно до 30 август, и тоа строго по предадени количини во регистрирани откупни пунктови без никакво условување на земјоделците.  Напоменуваме дека доколку не бидат прифатени овие барања и укажувања ние како Национална земјоделска мрежа заедно со нашите членови од Кочанскиот регион но и од останатите производни региони ќе ги преземеме сите демократски мерки кои ни стојат на располагање согласно позитивните законски прописи.