Македонското јагне во Италија-Ние ќе го плаќаме по 800 денари за килограм

Веќе 80% од јагнињата се откупени и се обработуваат за извоз за католички Велигден. Главно извозот е на италијанскиот пазар, објаби Плус инфо .

Според сточарите, откупната цена од 220 до 240 денари за килограм жива мера е ниска и не ги покрива основните трошоци. Но, мора да ги продадат јагнињата зашто така ќе ги добијат субвенциите.

-Оваа цена што ни ја понудија кланичарите, од 220 до 240 денари е ниска, но мора да ги дадеме втасаните јагниња зашто така ги добиваме субвенциите. Имаше извоз за косовскиот пазар од 320 денари, ама тоа е ризик зашто не добиваме право на субвенции. Цената не ги покрива основните трошоци – вели Зоран Спасески, сточар од прилепското село Мало Коњари.

Тој е еден од двајцата сточари во селото кои упорно се занимаваат со одгледувањето овци од поранешните 38 семејства и стадата од вкупно 3.500 грла овци.

– Само љубовта спрема одгледувањето овци и занимавањето со оваа сточарска гранка ме одржува. Откако знам се занимавам со овчарство, но нема кој да не наследи.  Ако не се субвенциите, тешко дека ќе се одржи оваа гранка – вели Спасески.

Спасески смета дека неможноста сам да ги бира пласманот и пазарот влијаат на моменталните состојби во овчарството.

-Како прво, сакам и треба јас да го избирам пазарот кому и како ќе ги продадам јагнињата, а не да бидам условуван. Состојбите се тешки и ако вака продолжат ќе нема овци во земјава – смета Спасески.https://plusinfo.mk