Набавени 50 илјади вакцини за болеста „чвореста кожа“

(Oвој напис е објавен на: February 25, 2017)

Агенцијата за храна и ветеринарство попладнево соопшти дека се обезбедени 50 илјади дози од вакцината против болеста „чвореста кожа“ кај говедата за итна вакцинација на добитокот во 19 општини во Источна и Југоисточна Македонија.

nabaveni 50 iljadi vakcini za bolesta chvoresta kozha

 

Со вакцинацијата ќе бидат опфатени Демир Капија, Штип, Василево, Радовиш, Босилово, Делчево, Виница, Пехчево, Берово, Ново Село, Струмица, Валандово, Дојран, Македонска Каменица, Гевгелија, Кратово, Конче, Зрновци и Богданци.

– Со вакцинацијата ќе бидат опфатени сите животни од видот говеда, без оглед на нивниот пол, возраст и месец на гравидност. Обезбедената количина вакцини е доволна со вакцинација да се покрие целата популација говеда во гореспоменатите региони и општини каде што е присутна болеста „чвореста кожа“, се наведува во соопштението.

Агенцијата за храна и ветеринарство истакнува дека ќе бидат опфатени зоните под надзор и заштитните зони во општините каде има потврдени позитивни грла, како и во областите кои се граничат со овие зони.

Носители на вакцинацијата се ветеринарните друштва кои имаат склучено договор со Агенцијата за храна и ветеринарство. Дел од нив, како што се наведува во соопштението, денеска под надзор на официјален ветеринар почнале со вакцинација на добитокот.