Земјоделскиот инспекторат да врши надзорот врз откупот на пченицата, бара Националната федерација на фармери

Националната федерација на фармери (НФФ), преку својот потсекторски систем, континуирано ја следи состојбата со пченицата, како во делот на производството, така и во делот на продажбата. Пченицата претставува стратешки производ за државата, дефиниран согласно Законот за земјоделство и рурален развој.

Пченицата останува најзастапена култура меѓу житните, со засеани 69.689 хектари или 44,5% од вкупната површина под житни култури (156 469 ха).^[1] Оваа година приносите од пченицата се задоволителни, и пченицата е со добар квалитет. Пченицата е стратешка култура која секогаш се соочува со предизвици при самиот откуп и висока производна цена.

НФФ активно учествува во процесот на лобирање преку потсекторските групи на Министерството за земјоделство, шумарство и водостопанство (МЗШВ) и го цени напорот на Министерството за изнаоѓање решение за откупната цена со пченица. Оваа година, со посредство на МЗШВ, постигнат е договор со откупувачите цената за прва и втора класа пченица да изнесува 12 денари по килограм, со тоа што на оваа цена ќе бидат додадени и трошоците за транспорт и ДДВ, кои ќе ги покријат мелничарите, односно пченицата која се транспортира од региони без млинови ќе има покриени дополнителни транспортни трошоци.

Сметаме дека ова е излезно решение за оваа година, но е потребно да се продолжи со понатамошни активности во насока на зголемување на приносите од пченица, намалување на производните трошоци, воспоставување на долгорочни и фер договорни односи меѓу земјоделците, мелничарите и откупувачите,преку договорното производство, активирање на интервентен откуп во кризни ситуации, согласно Законот за земјоделство и рурален развој и воведување нови технологии,  и економско здружување на фармерите во задруги и организации на производители.

Националната федерација на фармери апелира до надлежните институции, особено до Земјоделскиот инспекторат, активно да се вклучат во надзорот врз откупниот процес на пченицата и да обезбедат фер и транспарентна постапка за сите земјоделци.