Денес ќе се знае дали ќе се замрзнуваат цените или ќе се ограничат маржите

До денеска, според најавите од Министерството за економија и труд, треба да биде готова есенската потрошувачка кошница со 100 производи.

Работната група, во која членуваат претставници од министерствата за економија, финансии и земјоделство, врз основа на направена симулација треба да донесе предлог – одлука дали ќе има замрзнување на цените или ќе се ограничат маржите од 5,10 и 15 проценти.

Предлогот, како што вчера најави министерот за економија и труд Бесар Дурмиши, ќе биде доставен до Владата наредната недела.

– Утре на крајот на денот, работната група ќе извести дали ќе се одлучи за замрзнување на цените или ограничување на маржите на 5, 10 или 15 проценти, рече вчера Дурмиши во изјава за медиумите.

Освен есенска, според најавите на надлежните, ќе има и зимска, велигденска, рамазанска кошничка. . . .

– Во зависност од тоа какви се потребите на граѓаните, во зависност од тоа што најмногу се троши, ќе го следиме процесот и нема да дозволиме да ни се случи повторно висока стапка на инфлација со што ќе се влијае негативно на стандардот на граѓаните.

Исклучително сум задоволен што стапката на инфлација во август на годишно ниво е 2,2 процента во однос на август минатата година што претставува навистина добар резултат, имајќи го предвид регионот и е меѓу првите во регионот, односно првите според ниска стапка на инфлација, би рекол и компетитивен во Европа и е понизок во рамки на еврозоната, што е добро, изјави во средата премиерот Христијан Мицкоски.

Стабилизирање на цените се очекува и со примената на Законот за нефер трговски практики кој треба да почне да се применува од 28 септември.

Рабатот и дополнителните трошоци од листата на 2 548 тарифни броеви на земјоделски и прехранбени производи во трговија на мало и трговија на големо ќе бидат ограничени на 10 проценти.

Според министерот за економија и труд, Законот ќе стапи на сила до крајот на месецот, а фирмите имале период од шест месеци да ги усогласат цените.

Државниот завод за статистика измери дека во август инфлацијата бележи зголемување од 2,2 проценти на годишно ниво, а цените на мало се зголемени за три проценти.

Во однос на јули, се бележи зголемување на трошоците на животот во делот храна и безалкохолни пијалаци за 1,2 проценти, рекреација и култура за 1,1 проценти, здравје за 0,8 проценти, ресторани и хотели за 0,7 проценти, домување, вода, електрика, гас и други горива за 0,6 проценти, мебел, покуќнина и одржување на домаќинствата, комуникации за 0,5 проценти и алкохолни пијалаци и тутун за 0,1 процент.

МИА