Нема поевтин леб од 50 денари

`Ржаниот леб вчера достигна вртоглава цена од 93 денари, интегралниот од 84, а белиот на парчиња од 56 денари. Цените се нешто пониски во поголемите маркети, но речиси никаде веќе не може да се најде леб под 50 денари. За една година, за одредени типови на леб, цената скокна за 100 отсто и не застанува тука, објави Телма.

Секој понеделник, граѓаните ги чека нов ценовен шок на рафтовите, но од мелничко-пекарската индустрија се неумоливи.

Новите цени на лебот се повисоки за 8 до 10 отсто. Причина за ваквото зголемување се скапите енергенси, велат од мелничко-пекарската индустрија, пренесе Сител.

-Тоа е најчесто од ударот на зголемувањето на цената на гасот која во авуст е неколкупати покачена во споредба со онаа во месец јули, како и со поскапувањето на електричната енергија со новите измени во правилникот и законите за малите компании кои учестуваат во регулираниот пазар како и за домаќинствата каде што исто така е зголемена цената на електричната енергија – вели Горан Малишиќ, претседател на групација на мелничко-пекарска индустрија.

Промена забележале и граѓаните. Велат дека од пред неколку дена, речиси сите видови леб имаат зголемени цени.

Очекувањата се дека цената на лебот и натаму ќе оди нагоре, паралелно со растот на цените на енергенсите.

Токму затоа мелничарите и пекарите побарале државна помош.

-Држвата мора да учествува во субвенционирање на компаниите со цените на електричната енергија, затоа што само ние сме како индустрија во нашава држава изложени на најскапа електрична енергија. Секаде во опкружувањето струјата е регулирана и субвенционирана од страна на владите. Ако продолжат цените на енергенсите да се зголемуваат, а тие го достигнаа својот пик во летниот период, замислете што ќе биде во есенските или зимските месеци – посочува Малишиќ.

Маржата на лебот останува ограничена на 5 отсто до крајот на септември. Дали и какви антикризни ќе има потоа, засега не се знае.