Откупните фирми да отстапат од нивната монополистичка позиција и да ги коригират откупните цени на тутунот

Почитувани тутунопроизводители

Според неофицијални информации на 29.11.2023 год во Скопје се планира повторна средба помеѓу претставници на откупните фирми, Министерството за земјоделие и Сојузот на земјоделски здруженија како законски застапник на нас тутунарите.  Како Национална земјоделска мрежа повторно упатуваме јавен апел првенствено до Сојузот најсериозно и одговорно да си ја прифати улогата и цврсто да застане во одбрана на тутунопроизводителите со безусловно барање да се изврши корекција на цените во нагорна линија по цени што јасно и јавно ги побаруваме односно 600 денари просечна откупна цена затоа што цената утврдена во договорите не ги покрива ни основните производни трошоци.  Неприфатливо е во услови на двоцифрена инфлација зголемени трошоци на производство опаднат животен стандард поради енормниот раст на основните животни намирници да предаваме тутун по вакви девалвирачки цени.

Апел и до откупните фирми да отстапат од нивната монополистичка позиција и да ги коригират откупните цени на реални и одржливи економски основи,  а не вака на еден нефер и манипулативен начин да се поигрувате со честа и достоинството на нас тутунарите како ваши коперанти и соработници со што во прашање се доведува иднината на ова битна стопанска гранка.  Искрено се надеваме дека ќе преовлада здравиот разум и економската логика кај сите социоекономски партнери и ќе се прифатат нашите оправдани барања. Од Вашите одлуки ќе зависи судбината на ова стопанска гранка, но и судбината на огромен број на граѓани. Одлуките но и одговорноста за последиците се ваши.

Национална земјоделска мрежа- претседател Ѓорги Каркашев