Овоштарите со години им го загорчуваат медот на пчеларите

Овоштарите со години им го загорчуваат медот на пчеларите. Употребата на пестициди со кои се третираат овошните насади е причината поради која со години наназад во кошниците има се помалку мед – се пожалија медарите во штипско.

За подобрување на состојбата, им порачуваат на земјоделците да ги исфрлат хемикалиите со кои ги прскаат овошките и наместо тоа да користат органски ѓубрива, кои не се штетни за пчелите и родот што го очекуваат.

Години наназад пчеларите на истокот бројат загуби. Климатските промени, кратките паши, недостигот од медоносна флора, се причините поради кои собираат помалку мед. Имајќи ги во предвид сегашните временски услови со пораното цутење на овошките, тие не се оптимисти и дека годината ќе биде подобра од лани.

На пазарот има недостиг од мед. Мед нема ниту во соседството. Поплавите и временските неприлики ги десеткуваа приносите, што резултираше со покачување на цената на медот. Од друга страна, за третирањето со пестициди земјоделците мора да водат евиденција, доколку сакаат субвенции, кои годинава ги има и за пчеларите, за набавка на матици и опрема преку мерката 50-50, од програмата за рурален развој.