Потсекторската група ќе работи на уредување на пазарот за жита
Во понеделник да се состане и да почне да функционира подсекторската група за уредување на пазарот на жита, е заклучокот од денешната средбата на министерот за земјоделство, шумарство и водостопанство Љупчо Николовски со претставниците на откупувачите на пченица, членки на стопанските комори.
Како што соопшти Министерството, подсекторската група треба да ги разгледа и да предложи краткорочни и долгорочни мерки за уредување на пазарот со пченица, односно мерки кои ќе придонесат за успешно извршување на откупот на пченицата од претстојната жетва и кои ќе бидат во интерес и на земјоделците и на мелничко-пекарската индустрија.
Оваа подсекторска група, се посочува, е формирана според Законот за земјоделство и рурален развој и во неа членуваат претставници од сите засегнати страни, односно од земјоделските здруженија производители на пченица, стопанските комори како и од научно-образовните институции.
