Пронајдена поголема количина марихуана во дом на прилепчанец

СВР Битола, Полициска станица Прилеп до Основно јавно обвинителство Прилеп поднесе кривична пријава против лицето Е.И. (27) од Прилеп поради постоење основи на сомнение за сторено кривично дело „неовластено производство и пуштање во промет на наркотични дроги, психотропни супстанци и прекурсори“.

Од секторот за односи со јавност на СВР-Битола соопштуваат дека во текот на вчерашниот ден, по претходно преземени оперативно тактички мерки и истражни дејствија и по добиена судска наредба, полициски службеници од Одделението за недозволена трговија со дрога од ПС Прилеп извршиле претрес во домот на пријавениот на ул. „Стибера“ во Прилеп и при претресот биле пронајдени едно стебло со корен без листови и кеса наполнета со зеленкаста материја, кои биле одземени со потврда за привремено одземени предмети.

Во соопштението на СВР-Битола се посочува дека кај пријавениот исто така биле пронајдени врвовите од стеблото, кои пријавениот ги спакувал во безбојно полиетиленско пакување и ги закопал во непосредна близина на локалната депонија. По извршеното вештачење било утврдено дека пронајденото стебло е растение од родот „канабис сатива“, а зеленкастата материја е наркотична дрога марихуана со маса од 689,4 грама.

Судија на претходна постапка на пријавениот му одреди мерка притвор во траење од 30 денови.