Силјановска-Давкова со двојна предност во првиот круг од претседателските избори

По пребројаните 99,85 отсто од избирачите кандидатката на ВМРО-ДПМНЕ има двојна предност пред кандидатот поддржан од СДСМ, додека кандидатот на коалицијата „Европски фронт“ е трет

Кандидатката за претседател на државата поддржана од ВМРО-ДПМНЕ, Гордана Силјановска-Давкова, и натаму води со двојна предност пред кандидатот на СДСМ, Стево Пендаровски, покажуваат најновите резултати на интернет-страницата на Државната изборна комисија (ДИК) по првиот круг на претседателските избори.

По пребројани 99,85 отсто од избирачите, Гордана Силјановска-Давкова има 362 682 гласа, а Стево Пендаровски 180 306 гласа.

По нив следува кандидатот за претседател на коалицијата „Европски фронт“ предводена од ДУИ, Бујар Османи кој од досега пребројаните избирачи има 120 903 гласа.

Претседателскиот кандидат од Движењето ЗНАМ – За наша Македонија, Максим Димитриевски е четврти на листата со 83 787 гласови, а по него со само 431 глас помалку е кандидатот на коалицијата „Вреди“, Арбен Таравари кој има 83 356 гласа.

Кандидатката од Левица Билјана Ванковска-Цветковска има 41 172, а последен на листата е Стевчо Јакимовски од ГРОМ со 8 103 гласа.