ТИКА ќе додели пчеларска опрема на 30 семејства

Турската агенција за соработка и координација – ТИКА, во рамки на „Проектот за развој на пчеларството во Северна Македонија”, денеска на 30 семејства ќе им додели пчеларска опрема, на церемонија што ќе се одржи во с. Курија во Општина Градско.

Како што информираат од Турската амбасада во Скопје, „Проектот за развој на пчеларството”, што се реализира почнувајќи од 2007 година во различни региони на Северна Македонија, има голем придонес во руралниот развој и зајакнување на социо-економските услови на населението.

Со активната имплементација на проектот во различни региони на Северна Македонија, дојде до заживување на животот во регионот, а добиениот мед, матичен млеч, прополис, полен и други производи почнаа да се пакуваат во традиционални домашни бизниси и се нудат на пазарот поединечно или преку здруженија основани од земјоделци.

За време на испитувањата спроведени оваа година во рамки на проектот одлучено е да се вклучат и семејства од Пласница, Ресен, Центар Жупа – Дебар, Скопје – Студеничани и Радовиш кои се занимаваат со пчеларство, но не можат да ја постигнат саканата ефикасност поради немање доволно кошници со пчели.

– Како резултат на проектната студија, започнати се ангажмани за обезбедување на современи пчеларници, работни материјали потребни за пчеларството и производството на мед и поддршка за обука на вкупно 30 семејства кои се занимаваат или имаат намера да се занимаваат со пчеларство во споменатите региони, се наведува во соопштението.