Утре продолжуваат протестите на струмичките земјоделци – најавено е мало зголемување на цената на пиперката
Ново соопштение на Месно здружение млади Муртино!
Здружението на земјоделци “Месно здружение на млади Муртино” денеска објави дека ќе има мало зголемување на откупните цени на пиперката – куртовска капија, но дека протестите ќе продолжат се до исполнување на нивните барања. Затоа утре најавуваат нов протест во Струмица. Соопштението ви го пренесуваме во целост – “Драги наши вредни земјоделци и поддржувачи, добивме информација директно од министерот за земјоделие Борче Серафимовски, кој вчера по неколку одржани состаноци со фабриките, предложено е мало (минорно) зголемување на откупните цени на куртовската капија.
На добар пат сме но не сме задоволни со цени што само едвај ќе нè одржуваат во живот. Нам ни се потребни фер, реални и перспективни откупни цени што ќе ни овозможат, покривање на производствените трошоци, услови за навремено вложување во следната производствена сезона и ДОСТОИНСТВЕН ЖИВОТ.
Оваа нова и добра вест е директен показател и мотивација дека вистинските промени се случуваат само кога постои единство, сплотеност и безусловна меѓусебна поддршка!
ЗАТОА НЕ ЗАПИРАМЕ ТУКА, ВЕ ПОВИКУВАМЕ СИТЕ ЗЕМЈОДЕЛЦИ И ПОДДРЖУВАЧИ УТРЕ – ПОНЕДЕЛНИК ВО 11:00 ПРОДОЛЖУВАМЕ СО МАСОВНА БЛОКАДА ПРЕД МИНИСТЕРСТВО ЗА ЗЕМЈОДЕЛИЕ, ШУМАРСТВО И ВОДОСТОПАНСТВО ВО СТРУМИЦА.
Блокадите ќе продолжат се додека не постигнеме официјален договор за перспективни откупни цени кои што ги заслужуваме!
Чесни и вредни земјоделци од: Банско, Муртино, Сачево, Свидовица, Куклиш. Робово, Дабиле, Босилово, Еднокуќево, Петралинци, Бориево, Моноспитово, Просениково, Василево, Пиперево, Добрејци, Сарај, Владевци, Нова Маала, Добрашинци, Ангелци, Вељуса, Гечерлија, Градско Балдовци и целата струмичка околина – ВЕ ПОВИКУВАМЕ ДА ИЗЛЕЗЕТЕ ВО ШТО ПОГОЛЕМ БРОЈ И ДА ЗАСТАНЕМЕ РАМО ДО РАМО!
Ве замолуваме секој што е во можност да дојде со земјоделска и приклучна механизација ќе биде од огромна помош.
Тргнуваме во 10:20 од центарот во Муртино.
ОВОЈ ПРОТЕСТ НЕ Е ПАРТИСКИ И СЕ ОГРАДУВАМЕ ОД СЕКАКОВ ВИД НА СОДРЖИНИ ИЗВАДЕНИ ОД КОНТЕКСТ ЗА ПАРТИСКИ ЦЕЛИ!
