Винаријата ,,Далвина’’ зеде учество на реномираниот ,,Сакура натпревар’’ во Токио Јапонија каде со квалитетот на своите вина, успеа да го привлече вниманието на стручните лица задолжени за оценување на аромата, вкусот, јачината, мирисот и останатите својства на понудените вина.
Станува збор за престижен натпревар кој по 6 пат се одржува во Токио а оценувањето го вршат водечки професионални жени поврзани со винската индустрија. Тие имат за цел да ги оценат но и да предложат вина за понежниот пол како купувачи и потрошувачи во целиот свет за секакви пригоди.
На Сакура натпреварот во Токио беа пријавени 4236 вина од цел свет при што Synthesis Barrique виното на Далвина освои златен медал, додека Elegija Rkaciteli сребро. Станува збор за црно и бело вино кои според енолозите поседуваат одличен квалитет а по својот вкус и арома се препорачливи за секакви прилики
,,Ова е огромен успех но и потврда за квалитетот што го нудиме на нашите вина. Од октомври минатата година ние сме присутни на пазарот во Токио но со добиените медали на овој престижен саем односно натпреварување, веќе сме во преговори за проширување на продажбата и во други градови во Јапонија,, информираа од винаријата.
Успехот во Токио е само потврда на наградите што ова винарска визба ги доби на натпревар во Германија каде освои шест медали – пет златни и еден сребрен. На престижниот германски натпревар ,,Mundus Vini’’ во конкуренција од 7.200 вина кои потекнуваат од 156 вински региони највисоката специјализирана награда ја понесе виното Hermes Vranec 2015 на Далвина. Ова вино беше прогласено за најдобро меѓу црвените и се закити со Grand Gold титулата.
В. Т.
