Грчките земјоделци ја блокираа границата со Македонија

Земјоделците од северна Грција вчера го блокираа пристапот од и кон граничниот премин Евзони на границата со Македонија, во знак на протест, пишува „Екатимерини“.

На протестот, кој заврши за неколку часа, учествуваа околу 50 трактори и 50 комбиња, но се очекува да биде првиот од неколку последователни протести против намалувањето на пензиите на фармерите и против другите мерки на буџетски ограничувања во земјата.

Денес се очекува на штрајк да излезат и земјоделците од централните делови на Грција. Македонскиот бизнис сектор, транспортерите и Железница уште ги бројат штетите од летната блокада на железничкиот сообраќај, како и од штрајкот на вработените на Солунското пристаниште. Раководството на МЖ “Транспорт” неодамна соопшти дека претпријатието претрпело над 5 милиони евра директна штета од несообраќањето на товарните возови меѓу Македонија и Грција.

Стопанската комора на Македонија, пак, во неколку наврати реагираше за честото неработење на Солунското пристаниште кое на Македонија е единствената најбрза и најевтина врска со поморскиот транспорт на товар. Од Стопанската комора на Македонија тогаш посочија дека ако продолжат честите блокади со Грција, не е исклучена можноста транспортот на стока да се прави преку пристаништето во Драч (Албанија), иако е многу поскапа варијанта. На презентацијата која неодамна се одржа во Стопанската комора на Македонија, раководството на пристаништето во Драч најави обнова на железничкиот сообраќај за да се подобри пристапот до албанската граница, како и отворање на суво пристаниште.