Над 100 барања поднесени за набавка на земјоделска механизација во штипско

Над 100 електронски апликации изработија советниците во штипската агенција за поттик и развој на земјоделството, за набавка на нова земјоделска механизација. За оваа мерка од програмата за рурален развој, позната како „50-50″, земјоделците во штипско пројавија најголем интерес досега.

До крајот на месецот тече рокот за аплицирање за повратни средства за новоподигнати лозови и овошни насади и набавен добиток во последното тромесечје лани. До 3 март тече рокот за млади земјоделци. Досега за првата мерка се пополнети три апликации, а 40-тина млади земјоделци конкурирале за отпочнување на земјоделски бизнис.

За трактори и механизација ќе се аплицира до сабота. Инаку, предлог измените од Законот за возила, кои се во законска процедура, предвидуваат земјоделците технички преглед на тракторите и тракторските приколки да вршат на две, а регистрација на секои шест години.

Со ова на земјоделците ќе им се намалат трошоците за регистрација, а истовремено ќе се зголеми безбедноста во сообраќајот – сметаат надлежните.