вестиСовети

Календар на земјоделците- Пчеларство

(Oвој напис е објавен на: јануари 9, 2019)

За нашите климатски услови јануари е типичен зимски месец. Температурите во
повеќето години се ниски, сончевите денови се релативно малку, а земјата е покриена со
снег. За пчелните семејства месец јануари е период на целосен мир – состојба во која тие
најдобро се спротивставуваат на за нив неповолните надворешни услови. Во овој период
животните функции на одделните индивидуи на пчелното семејство- матицата и пчелите
работнички, се сведени на минимум. Формирањето на зимското кубе во пчелното
семејство овозможува да се намалат оксидирачките процеси во телото на пчелите, како
резултат на помалиот прилив на кислород од воздухот што се наоѓа околу кубето. Колку
позбиено е пчелното семејство и погуста маса формираат пчелите во него, толку подобро
се одвива презимување на пчелите. Пчелите консумираат помалку храна, помалку се
истоштуваат физиолошки и живеат подолго во текот на пролетта. Пчелите се адаптирани
кон целосен зимски одмор. Секое негово нарушување без оглед од какви причини
станало им штети на нивното добро презимување. Затоа во јануари не е корисно да се
дава на пчелите храна – погачи, припремена од страна на пчеларите или купена, па дури
и мед во погачи или кристализиран, даден како пита над кубето. Прихранувањето на
пчелните семејства во јануари, ако тие не се загрозени од глад, е погрешно. Давањето
храна на пчелите во јануари во каква и да е форма им штети во неколку насоки. Од
целосно мирување тие инстинктивно веднаш минуваат во активна состојба – ја
зголемуваат температурата во кубето, за да можат пчелите од надворешната страна на
кубето да се одделат и да стигнат до храната, да ја растворат и пренесат во течна
состојба до ќелиите од сакето. Оваа активност трае повеќе од 10-15 дена, за кое време
пчелите се во состојба на зголемена активност и консумираат повеќе храна за да ја
створат потребната топлина. Заедно со тоа тие треба да го преработуваат шеќерот во за
нив достапна форма – да ги претворат сложените шеќери во прости, како и да го лачат од
жлездите ензимот инвертаза што ги истоштува физиолошки. Во јануари и воопшто во
текот на целиот зимски период пчелните семејства, кои останале без храна во
централниот дел на сандакот, наместо тврда храна треба да им се даваат погачи со мед.
За таа цел треба да се прераспределат медовите резерви во самиот сандак преку
преместување на рамките (рамките со мед да се распоредат меѓу празнините во центарот
на сандакот). Ако во гнездото храната е намалена, што е недозволиво при нормална
подготовка и зазимување, во замена на празните рамки на пчелите треба да им се дадат
рамки со мед од резервите. Во јануари во нашата земја паѓа понекогаш дебел слој од
снег, кој може да го затрупа половина или целиот сандак. Во такви случаи пчеларите не
треба да брзаат да го отстранат снегот освен ако тој, не го затворил целосно летот на
сандаците. Пчеларот треба да ги посетува пчелите периодично, како и после невреме, за
да се контролира состојбата на сандаците – да нема откриени пчелни семејства или пак
превртени, да нема штети нанесени од трети лица, како и штети од клукајдрвец. Барем
еднаш во месецот тој треба да изврши контрола на сандаците така што со слушање ќе
констатира каква е состојбата на пчелното семејство внатре во сандакот. Во текот на
јануари пчеларот продолжува со поправка на инвентарот, кој ќе го користи во следната
сезона, и подготовка на рамките со восок (поставување и затегнување на жици), како и
подготовка на минимум по 5-6 рамки за Дадан – блат сандацитe.


 

agencija.gov.mk

Тагови

Валентина Соколовска

Зелена берза – Гласот на земјоделецот Заедно со Вас, драги земјоделци, ја создадовме „Зелена берза“, како Здружение на земјоделци, како начин на заедничка работа преку кој ќе стигнеме до нашите јасни заеднички цели: да се слушне гласот на секој земјоделец, да размениме искуства, да создадеме услови во кои ќе можеме успешно да работиме, а земјоделскиот труд да добие соодветен приход. „Зелена берза“, постои за Вас, да ве поттикне, да ве информира, но и заеднички со Вас да се избори за квалитетно и исплатливо производство, за производи кои гарантирајќи квалитет ќе обезбедат сигурност, стабилност и добар профит. Визијата на најголемото, невладино и непрофитно, земјоделско здружение во Р. Македонија – „Зелена Берза“ е да прераснеме во здружение со илјадници членови, здружение со големо влијание врз законските норми кои го регулираат земјоделието и здружение кое ќе му даде глас на секој индивидуален земјоделец. Грб во тешките времиња и земјоделски промотор во добрите. Нашата мисија е да го промовираме македонскиот земјоделец, да градиме партнерски односи со производителите и со трговците, да создадеме заедница на македонските производители на храна која ќе ги претставува и ќе се бори за интересите на современето македонско земјоделие, во државата и странство. Приклучете ни се, бидете дел од нас. Раскажете ја вашата приказна, актуелизирајте го Вашиот проблем, презентирајте ја Вашата идеја, понудете добри совети. Ние сме тука, да го пренесеме Вашиот збор, да преземеме активности и заеднички да креираме успеси, што ни е силно потребно, на сите нас, кои директно или индиректно, сме дел од земјоделието. Успехот во оваа гранка, е успех на животот, зошто здравата храна е еден од клучните фактори за здрав живот, а земјоделецот е неговиот најважен столб. И нашиот месечник е олицетворение на вредностите кои ги застапува Зелена берза. Делењето на бесплатни примероци има за цел да го зголеми опсегот на гласот на земјоделците, заедно да ги решиме децениските земјоделски проблеми, натежнати врз сите нас. Заедно да го продолжиме патот кој започнавме да го трасираме. Креирајте го Вашиот весник, според Вашите желби и потреби. Ние сме тука за Вас. Редакцијата на нашиот и Ваш весник, Ви стои на располагање за споделување на Вашата приказна, Вашите совети и Вашето искуство во земјоделието. Контактирајте не на телефон 071 207 021, преку електронска пошта [email protected] или на страната на ФБ / Зелена Берза Срдечен поздрав, Вашата Зелена Берза

Слични написи

Back to top button
Close