МЗШВ прави анализи и ќе ги објави штетите од косовската мерка за царините
Премиерот Зоран Заев денеска соопшти дека Министерството за земјоделство прави анализи по што ќе објави колкави се штетите од косовската одлука со која царините за извоз на зеленчукот и овошјето од 18 јули до вчера беа 30 отсто повисоки.
– Среќен сум што Косово трипати дебатираше на оваа тема, се корегираше и ја повлече мерката, рече Заев на прес-конференција во Владата, одговорајќи на новинарски прашања.
Според него, Косово е силен трговски партнер на Македонија и Македонија сака тоа така да остане.
– Работиме комплетно во таа насока, да ги унапредиме и развиеме сите видови соработка со Косово, дополни премиерот.
Заев оцени дека однесувањето и внимателноста на македонската Влада во однос на косовската мерка уште еднаш го потврди пријателскиот однос што Македонија сака да го негува со сите свои соседи дури и кога нешто неправично, нефер и непријателски се случува кон неа.
– Нашите соседи се наши големи пријатели. Така е и со Косово. Одлуката се случи во период кога интензитетот на извозот на земјоделските производи беше прилично низок, кога шпицовите беа завршени. Веројатно тоа беше и една од причините да бидеме внимателни. Сите министри се впуштија во разговори, и економските и за надворешни работи, и јас директно со премиерот Рамуш Харадинај. Сите заедно за мерките брзо да се отстранат, бидејќи кога една земја, без разлика дали е соседна, ќе воспостави нови давачки, логичен е реципроцитет, подвлече Заев.
