Николовски: Неопходни се системски мерки за поддршка на пчеларството

(Oвој напис е објавен на: October 24, 2017)

Министерот за земјоделство, Љупчо Николовски присуствуваше на отварањето на дводневниот Саем на мед во Кочани на кој учествуваа триесетина излагачи, производители на мед и пчелни производи од сите краеви на Македонија.

 

– Оваа манифестација  е одлична можност граѓаните да се запознаат со врвните македонски пчелни производи, а за пчеларите да разменат искуства кои ќе им помогнат во производството. Пчеларството е гранка која има посебен придонес за нашиот земјоделски сектор поради големото билошко значење на медоносните пчелни производи и опрашувањето на фуражните и овошните  култури, а од пчеларството произлегуваат и високо квалитегни производи, истакна Николовски.

Познато е и огромното хранливо својство на пчелните производи бидејќи пчелите произведуваат производи кои не можат да се добијат во фармацевтските лаборатории. Затоа, истакна Николовски, пчелните производи имаат и висока вредност и се мошне барани на пазарот.

– Свесни сме дека оваа година поради временските прилики беше исклучително тешка за целиот земјоделски сектор, вклучувајќи ги тука и пчеларите кои претрпеа големи штети поради ниските температури и сушата. Како ресорно министерство сме во постојан контакт со пчеларските здруженија и со Сојузот на пчелари на Македонија со цел да најдеме соодветни мерки за решавање на проблемот, истакна Николовски.

Посочи дека меѓу првите исплати што ги направи МЗШВ беа субвенциите за пчеларите.

– Исплативме над два милиона евра во ист ден субвенции за пчелни семејства, а работиме и на спречување на нелојалната конкуренција која создава дополнителни проблеми на пчеларите, истакна Николовски.

Најави натамошна ефикасна подршка на пчеларството и зголемување на финансиска подршка во земјоделството и програмите за рурален развој.

– Неопходни се системски мерки за посеопфатно искористување на природните потенцијали во полза на пчеларството. Нашите идни политики ќе бидат во насока на развој и унапредување и создавање на конкурентни производи со висока додадена вредност, истакна министерот Николовски.

Share Button