Со 100 милиони денари се подобрува инфраструктурата во Крушево

„Инвестираме значајни средства за раст и развој на локалната економија, подобрување на условите за живот на граѓаните, но и за зголемување на туристичкиот потенцијал на Крушево“, истакна министерот Благој Бочварски, при денешната работна посета на општина Крушево, каде заедно со заменик министерот Беким Реџепи, државниот секретар Митко Трајчулески и градоначалникот Томе Христоски, извршија увид во рехабилитација на улицата „Питу Гули“, проект финансиран преку Министерството за транспорт и врски.

Улицата „Питу Гули“ во градот Крушево, која се наоѓа во градското јадро и е од големо значење за населението во тој дел од градот, се реализира токму преку овој проект.

„Она што го ветивме пред жителите на Крушево, сега го гледаме на дело. Рехабилитацијата на улицата „Питу Гули“ за која инвестираме 5,5 милиони денари е во завршна фаза. Имаме комплетно нов асфалт и поставени се нови гранитни рабници, а во овој момент се поплочуваат тротоарите, со што овој дел од градот добива комплетно нов изглед“, изјави министерот за транспорт и врски, Благој Бочварски.

Тој ја потенцираше одличната комуникација и соработка помеѓу Министерството за транспорт и врски и општина Крушево и истакна дека само на тој начин можат да се реализираат што повеќе проекти и граѓаните да бидат позадоволни.

„Со општина Крушево и градоначалникот Христоски имаме одлична соработка. Со добра комуникација и со добри проекти го подобруваме животот на Крушевчани и го зголемуваме туристичкиот потенцијал на Крушево. До сега преку Министерството за транспорт и врски инвестиравме преку 100 милиони денари за изградба и модернизација на патната и комуналната инфраструктура во општина Крушево, вклучувајќи ја изградбата на водоснабдителните објекти во Норово, Саждево и Борино, регионалниот пат од Крушево – Пуста Река, патниот правец Стопанство – Норово, како и транзитот низ градот. Инвестициите тука не завршуваат, продолжуваме со активна поддршка на сите локални самоуправи“, истакна министерот Бочварски.

Во општина Крушево преку Министерството за транспорт и врски во овој момент се реализира и изградбата на резервоарот што ќе го подобри водоснабдувањето во населеното место Јакреново, како и се работи на водоснабдувањето на индустриската зона „Опаленик“ за што вкупно се инвестираат 10 милиони денари.

Градоначалникот Христоски истакна дека инвестициите и проектите кои се реализираат во последните неколку години во Крушево се од огромно значење за крушевчани и дека никогаш како сега не се работело во Крушево и покрај тоа што се наоѓаме во една светска економска криза.

„Во Крушево се гради, во Крушево се вложува како никогаш до сега. Оваа улица беше долгогодишно барање на локалните жители и како што ветивме со министерот Бочварски, комплетно ја рехабилитиравме. Во овој момент се работи на поплочување на троторите со гранитни плочи, со што проектот во целост ќе биде завршен 100% до крајот на месецот. Покажуваме дека кога се сака се може и со квалитетни проекти го менуваме изгледот на Крушево. Благодарност за поддршката од Министерството за транспорт и врски, одличната соработка продолжува и во наредниот период, бидејќи Крушевчани заслужуваат најдобри проекти и подобри услови за живеење“, изјави градоначалникот на Крушево, Томе Христоски.https://nezavisen.mk/so-100-milioni-denari-se-podobruva-infrastrukturata-vo-krushevo/