Во Никифорово никој не знае кој дел од нивниот атар државата го дава под закуп

На дваесетина дена до техничката влада Министерството за земјоделство реши да дава државно земјиште под закуп во 878 катастарски општини. Министерството за земјоделство, шумарство и водостопанство (МЗШВ) соопшти дека се распишани четири јавни повици за давање под закуп земјоделско земјиште до три хектари во 34 региони во 878 катастарски општини (атари). Една од тие катастарски општини е и Никифорово, село во Општина Маврово Ростуше чии жители оваа одлука ја поврзуваат со неодамнешниот обид на Советот на општината да се продаваат градежни парцели од по 400 квадратни метри околу Мавровското Езеро.

Како да има некоја стратегија да се разнебити овој крај, незадоволни се мештаните од околните села на Мавровското Езеро. Тие и за оваа одлука на Министерството за земјоделство веќе испратија реакција до надлежните власти и се надеваат дека новата власт нема да дозволува носење на вакви решенија без консултации со месните заедници. Истото го направија и за обидот на Советот на Општина Маврово Ростуше да донесе одлука  за парцелизација на државното земјиште околу езерото на парцели од по 300-400 квадратни метри за станбени објекти.

Според информацијата на Министерството за земјоделство се работи за издавање на земјоделското земјиште во државна сопственост под закуп за подигање долгогодишни насади (лозја, овоштарници, хмељ) и оранжерии, за период до 30 години, подигање долгогодишни насади со лешник за период до 70 години, подигање маслинарници за период до 50 години, одгледување други земјоделски култури и за поставување пчелни семејства за период до 15 години, ливади за период до 15 години, за одгледување брзорастечки дрвја на земјоделско земјиште на над 700 метри надморска висина за периодот до 30 години и рибници до 20 години.

Жителите на Никифорово поим немаат за кој дел од атарот на нивното село се работи и се надеваат дека сепак некој од државата ќе ги праша и ќе се консултира со нив. Тие велат дека дел од тоа државно земјиште сè уште е предмет на спор на приватни лица за денационализација.

Текстот е преземен од https://mkd.mk/