Почнува сезоната на берба на боровинки – апел за совесно однесеување на берачите

(Oвој напис е објавен на: August 5, 2019)

Од Националниот парк Пелистер апелираат до собирачите на боровинки да не оставаат ѓубре зад себе, појава која редовно се случува секоја година. Бербата оваа година ќе започне на 10 август.

-Едвај успеваме да исчистиме, не го оставаат на видело, го кријат, а кога има ветер излегува на површина. Апел и до берачите од околината на Ниже Поле да не кампуваат кај Црвена река, Лак поток и Сапунчица каде се напојува Битола со вода за пиење, за да не дојде до загадување на водните текови. Нашите служби тоа ќе го контролираат, но апелот е добредојден, вели ПЕЦЕ ЦВЕТАНОВСКИ, НАЦИОНАЛЕН ПАРК ПЕЛИСТЕР.

Секој собирач на боровинки мора да има легитимација и маркица која ја издаваат од националниот парк, а оние кои не ги почитуваат законските прописи може да се соочат со казна.

-На задната страна од легитимацијата ги пишува правилата, што не треба, а што треба да се прави, плаќаат членарина, треба да ја носат легитимацијата и маркицата за оваа година за да немаат проблеми. Сме имале случаи кога нелегално собирале, сме пријавиле до судски органи, казните се високи и не би било пожелно да се соочат со таков проблем, вели Цветановски.

Оваа година бербата на боровинки започнува малку подоцна затоа што се уште не е достигната биолошката зрелост. Од Националниот парк Пелистер напоменуваат дека предвремено собирање и вршење откуп е строго забрането, а редарите на националниот парк и шумската полиција постојано ќе преземаат активности за спречување на таа појава. Неправилното собирање, како што е откорнување на цело растение, сечење гранки, собирање незрели плодови предизвикува големи штети врз боровинката.

 


 

sitel

Share Button