fbpx
Агро бизнисВестиМакедонијаТоп вести

Жителите на Вељуса излегоа на протест и побараа институциите да ги заштитат од крадци

Проблемот, како што велат жителите, не се само кражбите, туку и честите закани од крадците.

Жителите на струмичко Вељуса излегоа на протест и побараа институциите да ги заштитат од крадците кои секојдневно во мали групи оперираат по нивните овошни насади со цреши. Со трактори и транспаренти, цел час го блокираа влезот на селото со цел да ги алармираат надлежните дека имаат проблем, кој со години се провлекува. Тврдат дека крадците освен што го собираат родот им ги уништуваат и дрвцата, корнејќи цели стебла со цреши. Се сомневаат во мала група на жители од соседното село Баница.

„Имам хектар под цреши, но за извесен период три пати сум цел на кражби и вандалско однесување. Уништени ми се веќе неколку дрвца. Запознаени се институциите за нашиот проблем, но решение нема. Мора да се стави крај на овој проблем оти нашата мака оди во неповрат. Планирав да го проширам насадот, но ме фаќа страв оти не знам дали воопшто ќе дојдам до берба“, вели Златко Станков, жител на Вељуса.

Проблемот, како што велат жителите, не се само кражбите, туку и честите закани од крадците. Веќе се плашат сами да одат до нивите, па мора да се организираат во мали групи.

„Да не може сам земјоделец да оди на нива на своето работно место, оти може да наидеш на група крадци кои со вили и секири може да те нападнат. Затоа мора да се групираме цели фамилии заедно да одиме. Не знам кое време дојде да се плашиш на свој имот да си одиш“, вели Бранко Витанов од Вељуса, кој тврди дека освен црешите ожнеана му била и цела нива со пченица.

Во селото нема полски чувари, а како што велат мештаните информирани биле и полицијата и градоначалникот на Струмица за нивниот проблем.

„Бараме од институциите на државата заштита и безбедност не е наше да предлагаме како и кој. Си има нивоа на власт, судска, законодавна извршна. Ние бараме на своето свои да бидеме“, кажа Ристо Тасев, одгледувач на цреши.

Во атарот на Вељуса има најмалку 200 хектари насади со цреши и стана најовоштарско село во струмичкиот регион.https://sdk.mk/index.php/dopisna-mrezha/protest-na-zhitelite-na-strumichko-velusa-baraat-zashtita-i-bezbednost-oti-kradtsi-im-gi-pustoshat-nasadite-so-tsreshi/

Тагови

Слични написи

Back to top button
Close